پنجشنبه ۱۴۴۶ ھ ق کال شوال ۵مه/ ۱۴۰۴ هـ ش د وري په ۱۴مه نېټه د ملي پراختیا شرکت عمومي اجرائیوي رئیس عبدالرحمن عطاش د ملي شرکت د غونډو په تالار کې د تېر شوي نېکمرغه کوچني اختر د مبارکۍ په پار جوړې شوې غونډه کې د ملي شرکت کارکوونکو ته د اختر مبارکۍ ترڅنګ په خپله وینا کې د ادارې د لید لوري، ماموریت، لاسته راوړنو، راتلونکو پلانونو او اصلاحاتو په اړه مهم ټکي مطرح کړل.
محترم عبدالرحمن عطاش د ملي پراختیا شرکت د موخو، ارزښتونو او اوږدمهاله ستراتیژۍ په اړه معلومات ورکړل او ټینګار یې وکړ، چې ملي شرکت د هېواد د اقتصادي ودې، زیربنایي پراختیا او عامه پروژو پلي کولو ته ژمن دی او په وينا یې، ملي شرکت هڅه کوي، چې د هېواد ملي پراختیا لپاره د تلپاتې او بنسټیزو پروژو تطبیق ته زمینه برابره کړي.
همدا راز نوموړي د ملي شرکت د روانو پروژو، لاسته راوړنو او د کارکوونکو له هڅو ستاینه وکړه او ویې ویل، چې د دې ادارې هر پرمختګ د کارکوونکو د ژمنتیا او هلو ځلو نتیجه ده، د بېلا بېلو پراختیايي پروژو یادونه یې وکړه، چې د ملي شرکت د هڅو له برکته تطبیق شوي، یو شمېر د تطبیق په حال کې دي او یو شمېر سترې او ملي برنامې به په نږدې راتلونکي کې پیل شي.
محترم عبدالرحمن عطاش وویل، د کارکوونکو مسلکي پرمختګ ته باید ځانګړې پاملرنه وشي، څو هغوی وکولی شي د خپل مسلک په چوکاټ کې پرمختګ وکړي او د ادارې د لا ښه فعالیت لپاره لا زیاته ونډه واخلي. نوموړي د نوښت، خلاقیت او مسؤلیت احساس ته د هڅونې پر اړتیا ټینګار وکړ او له کارکوونکو یې وغوښتل چې د نوښت له لارې ستونزو ته حل لارې ومومي او خپل مسؤلیتونه په پوره امانتدارۍ ترسره کړي، ځکه دا مسؤلیت ډېر دروند او د میلیونونو هېواد والو هیلې او امېدونه ور پورې نغښتي دي.
په دې غونډه کې د ملي پراختیا شرکت مالي او اداري مرستیال مولوي عبدالولي عادل هم وینا وکړه او د اداري اصلاحاتو، د کار د لا ښه والي، د همغږۍ او ټیمي کار د ارزښت په اړه یې خبرې وکړې او زیاته یې کړه، د دې ادارې اصلاحات، د کارکوونکو معیاري کړنې، روڼتیا او د حساب ورکونې اصل په پام کې نیولو پایله ده، چې کارونه یې غوره او اغېزمن روان دي.
په پای کې دغه غونډه د نوموړي په دعا سره پای ته ورسېدله.
