د ملي پراختیا شرکت عمومي اجرائیوي رئیس عبدالرحمن عطاش او مل تخنيکي ټیم له پروژو څخه د لیدنو په لړ کې دا ځل د جبل السراج د سمنټو فابریکې له چارو څخه لیدنه وکړه. ښاغلي عطاش د فابریکې سمنټو له تولید او د دې فابریکې له شنې سیمې څخه د لیدنې پرمهال خوښي څرګنده کړه او مسؤلینو ته یې د چارو د پرمخ وړلو لپاره لازمې لارښونې وکړې ترڅو په چارو کې له دقت او اړینې توجه څخه کار واخلي. د ملي پراختیا شرکت عمومي اجرائیوي رئیس د جبل السراج سمنټو له فابریکې څخه د لیدنې پرمهال زیاته کړه، د فابریکې شاوخوا د شنې او زرغونې سیمې جوړول اړین او خورا ځانګړی اهمیت لري او هم یې د فابریکې مسؤلینو ته دنده وسپارله ترڅو د شنې سیمې پر پراختیایي طرحې کار وکړي. د یادولو وړ دی، چې د جبل السراج د سمنټو فابریکه په ورځ کې له ۸۰ څخه تر ۱۰۰ ټنو پورې سمنټ تولیدوي او د هېواد دننه بازارونو ته یې وړاندې کوي.

د ملي پراختیا شرکت مالي او اداري مرستیال مولوي عبدالولي عادل او تخنیکي ټیم زابل ولایت ته د خپل سفر په ترڅ کې د تورې بند له چارو څخه لیدنه وکړه او هم یې ځایي مسولینو ته د چارو د چټکتیا او په ښه کیفیت د تطبیق لپاره اړینې لارښوونې وکړې. د یادولو وړ دی، چې د تورې بند د قلات ښار په څلور کیلومترۍ کې موقعیت لري او د جوړولو چارې یې د ملي پراختیا شرکت له لوري پرمخ وړل کېږي

د ملي پراختیا شرکت مالي او اداري مرستیال مولوي عبدالولي عادل، نیمروز ولایت ته د خپل سفر په ترڅ کې، چې د بنایي ودانیز ریاست رئيس عبدالله احمدزي، افغاني ودانیز ریاست رئیس عبدالقادر متین، نظارت ریاست رئیس عبدالسمېع میرخېل او تخنیکي ټیم یې ملتیا کوله د کمال خان بند له ترکو او افضل کلا کانالونو له روانو چارو څخه لیدنه وکړه. مولوي عبدالولي عادل د دې پروژې له چارو څخه د لیدنې ترڅنګ د ځایي مسؤلینو ستونزې واورېدې او د حل د ډاډ ترڅنګ یې په خپلو خبرو کې د کمال خان بند ترکو او افضل کلا کانالونه د هېواد ستره او حیاتي پروژه یاده کړه او مسؤلینو ته یې د چارو د لا ښه تطبیق په موخه اړینې لارښوونې وکړې. د یادولو وړ دی، چې د کمال خان بند د ترکو او افضل کلا کانالونو کیندل د هېواد په جنوب لوېدیز کې د ملي پراختیا شرکت له سترو پروژو څخه ده، چې چارې یې اوس مهال له ۹۰ سلنې څخه ډېرې بشپړې شوي دي.

د ملي پراختیا شرکت مسوولینو، نن شنبه (۲۶ وري ۱۴۰۲) د حکومت د اطلاعاتو او رسنیو په مرکز کې د یوه خبري کنفرانس پر مهال، د ۱۴۰۱ مالي کال د کړنو او فعالیتونو راپور له رسنیو سره، شریک کړ. د ملي پراختیا شرکت مالي او اداري مرستیال، مولوي عبدالولي عادل وویل: ملي پراختیا شرکت په تېر ۱۴۰۱هـ ش کال کې د ۹۳ پروژو د تطبیق چارې چې بندونه، کانالونه او عامه ځایونه پکې شامل وو تر لاس لاندې نیولې وې، چې له ډلې یې تر دې دمه د ۸۳ پروژو چارې بشپړې کړي او د پاتې ۱۰ سترو او ملي پروژو چارې په خورا چټکۍ سره روانې دي. مولوي عبدالولي عادل زیاته کړه، د قوش تېپې د ستر او ملي کانال د لومړي فاز چارې ۷۲.۲۷ سلنه بشپړې شوي، اوسمهال په کې شاوخوا ۴ زره ماشینري او له ۷ زره ډېر کسان په کار بوخت دي. همدارنګه نوموړي وویل، د کمال خان بند د قلعه افضل او ترکو کانالونو د کیندنې چارې هم د ملي پراختیا شرکت له لوري په خورا چټکۍ سره روانې دي، چې تر دې دمه یې ۹۲ سلنه چارې پرمخ تللې دي. د ملي پراختیا شرکت د بنایي ودانیز ریاست رئیس عبدالله احمدزي وویل، د قوش تېپې کانال د لومړي فاز د دویم لاټ کانکرېټ اچونه او ۱۰۸ کیلومتره واټن کیندنه، د هېواد په بېلا بېلو برخو کې د ۵۴ جوماتونو جوړول، نمک آب کانال، توري [...]

په بغلان ولایت کې د ملي پراختیا شرکت اړوند د غوری سمنټو فابریکو ریاست له لوري د ترقي بڼ د پراختیا او نیالګیو کښېنولو چارې د غوري سمنټو فابریکو د رئیس له لوري پیل شوې. د مسؤلینو په خبره، په دې پړاو کې په ۶۰ جریبه ځمکه باندې به د بادامو او پستې ۶۰۰۰نیالګي کښېنول شي، چې له ډلې به یې ۵۶۰۰ بادام او پاتې د پستې نیالګي دي. د یادولو وړ ده، چې د ترقي بڼ د غوري سمنټو فابریکو ریاست له لوري د دې فابریکو اړوند سلګونه جریبه ځمکه کې د څاڅکو په سېسټم جوړ شوی دی.