پنجشنبه ۹ سلواغه ۱۳۹۹ د ننګرهار ولایت کې د شینوارو ولسوالۍ د هسکې مینې جودرې کلي جومات له بیا ودانیدو وروسته نن د یو لړ مراسمو په ترڅ کې پرانیستل شو. د دې جومات په پرانیست غونډه کې د ننګرهار والي، یو شمیر ولایتي او ځايي دولتي چارواکو، دې پروژه کې د ملي پراختیا شرکت ځايي مسئولینو، قومي مخورو، سپینږیرو او ځوانانو برخه اخیستې وه. د یادونې وړه ده دا جومات چې تیر کال د تلې میاشت کې د یوې چاودنې په پایله کې له منځه تللی وو او لسګونه لمونځ کوونکي پکې شهیدان شول؛ د ملي پراختیا شرکت، د جمهوري ریاست د ملي پراختیا عملیاتي او ملاتړې ادارې په مالي ملاتړ په بنسټیزه توګه بیا له سره ودان کړ.

پنجشنبه ۹ دلو ۱۳۹۹ د ملي پراختیا شرکت د خصوصي همکارو شرکتونو ستونزو او وړاندیزونو ته د رسیدنې په موخه نن د دې شرکت د مالي او اداري مرستیال ښاغلي ضیاءالله شفیق په مشرۍ ناسته ترسره کړه. د ستونزو د حل، وړاندیزونو او شکایتونو ته د رسیدنې په دې غونډه کې، چې د ښاغلي ضیاءالله شفیق ترڅنګ، اړوندو مسئولینو او د یو شمیر همکارو شرکتونو استازو په کې برخه اخیستې وه؛ د وړاندیزونو او شکایاتو د حل په موخه ټاکل شوي کمیسیون ته دنده وسپارل شوه چې هر څه ژر لاس په کار شي او ستونزو ته رسیدنه وکړي. د ملي پراختیا شرکت مالي او اداري مرستیال د همکارو شرکتونو د استازو د وړاندیزونو او ستونزو له اوریدو وروسته، هغوی ته ډاډ ورکړ، چې ستونزې به ېې په وخت حل او رغنده وړاندیزونه به ېې اوریدل او پلې کیږي. ددې غونډې په پای کې د مسئولو څانګو آمرینو ته دنده وسپارل شوه، چې د یوې اونۍ په ترڅ کې د همکارو شرکتونو ټولو شکایتونو ته رسیدنه او ستونزې ېې حل کړي.

چهار شنبه ۸ سلواغه ۱۳۹۹ دا جومات چې ښرنې ښار ته نږدې په دوه پوړونو کې ودان شوی، پاتې ودانیزې چارې به ېې هم په کم وخت کې پای ته ورسیږي. ددې جومات عملي کارونه د ملي پراختیا شرکت اړوند د بنايي ودانیز شرکت لخوا پلې او مالي لګښت ېې د جمهوري ریاست د ملي پراختیا عملیاتي او ملاتړې ادارې لخوا ورکول کیږي. دا جومات چې په یو وخت کې به د شاوخوا ۲۰۰۰ تنه لمونځ کوونکو د ځائیدو وړتیا ولري، د ملا امام لپاره د اوسیدو خونه، اودس ځای، تشنابونه او نورې اړینې آسانتیاوې لري. له دې جومات سربیره پکتیکا ولایت او ولسوالیو کې د ملي پراختیا شرکت لخوا په څو نورو ودانیزو پروژ هم کارونه روان دي.

چهار شنبه ۸ سلواغه ۱۳۹۹ په بادغیس ولایت کې د یو باب پنځوس بستریز روغتون ودانیزې چارې دوام لري، چې د کویډ ۱۹ ناروغۍ د درملنې تر څنګ به، په نورو روغتیايي برخو کې هم خدمات وړاندي کړي او هڅه کیږی چې په خپل ټاکلي وخت ېې کارونه بشپړ شي. دا روغتون چې له وړاندې جوړو ودانیزو ټوټو څخه په ګټې اخیستنې سره ودانیږي؛ عملیات خونه، او پي ډي، اکسرې او عاجله څانګه، لابراتوار، د وینې بانک، درملتون او نورې اړینې برخې لري. ددې پروژې مالي لګښت د آسیا پراختیايي بانک لخوا ورکول شوی او ودانیزې چارې ېې د ملي پراختیا شرکت اړوند د کور جوړونې شرکت لخوا پلې کیږي.

سه شنبه ۷ سلواغه ۱۳۹۹ د ملي پراختیا شرکت نیمروز ولایت کې لوبغاړو ته د یو مناسب او معیاري ځای د جوړولو په موخه هلته په یو باب جمنازیم تر کار لاندې لري چې له لوبغاړو سره په یو وخت کې د ۱۵۰۰تنو سیلانیانو د ځاییدو وړتیا لري. ددې جمنازیم ودانیز کارونه چې کابو بشپړ دي، د جمهوري ریاست د ملي پراختیا عملیاتي او ملاتړې ادارې په مالي ملاتړ د ملي پراختیا شرکت د بنايي ودانیز شرکت لخوا پلې کیږي. د ملي پراختیا شرکت د یاد جمنازیم د ودانیزو چارو د پرمخ وړلو ترڅنګ، په نیمروز ولایت کې یوشمیر نورې پروژې هم پلې کوي چې له پرانیستو سره به ېې په اړوند برخو کې تر ډیره بریده د خلکو ستونزې حل شي.

دوشنبه ۶ سلواغه ۱۳۹۹ د هیواد ابادۍ تر عنوان لاندې، د وطني تولیداتو دوه ورځنی نندارتون د کرنې او مالدارۍ د وزیر انورالحق احدي، د ننګرهار والي ضیاالحق امرخېل، د ننګرهار وادي کرنیز شرکت (کانال) رییس عبدالقهار حیدري، ولایتي شورا غړو او یو شمېر نورو لوړو پوړو چارواکو له لورې پرانیستل شو. په یاد دوه ورځني نندارتون کې په ۱۷۳غرفو کې چې ډير شمیر ېې د وادي کرنیز شرکت اړوند وې، د ننګرهار کرنیز نباتات او سابه، لبنیات، وچې مېوې، شات، ترکاڼۍ برخې تولیدات، زراعتي وسایل، درمل او نور ګڼ شمېر توکې نندارې ته وړاندې شول. د کرنې وزیر، والي او ولایتي شورا غړو د ملي پراختیا شرکت اړوند د ننګرهار وادي کرنیز شرکت له غرفو څخه د لېدنې پرمهال ددې شرکت له کارونو او نندارتون کې له ایښودل شوو نباتي، حېواني او ترکاڼۍ اجناسو ستاینه وکړه. د کرنې او مالدارۍ وزیر انورالحق احدي له نندارتونه د لیدنې پر وخت وویل چې ننګرهار زراعتي او اقتصادي ولایت دی او هڅه کوي چې د هېواد په کچه یې د صنعتي ولایت په توګه هم بدل کړي. د یادونې وړ ده د ملي پراختیا شرکت اړوند د ننګرهار وادي کرنیز شرکت په ټينګو او نه ستړیکیدونکو هڅو سره غواړي چې له خپلو شته ځمکو څخه د کرنې، بڼدارۍ، څارویو او کبانو د فارمونو د ودې او پراختیا لپاره ښه استفاده وکړي، څو هیواد په اړند برخو کې د پردیو له احتیاجه خلاص [...]